الغدر

معايا اشتريت بيها نصيب اخويا واختى اخدت نص نصيبها وقالتلى هستنى عليكى على ما تسدديلى الباقى واخدت البيت اول ما اخدته الشقه اللى فالدور الارضى فتحتها تلات محلات واجرتهم عشان اخد ايجارهم واعمل جمعيات واسدد اختى واوضب الشقه اللى فوق عشان اقعد فيها بدل الشقه اللى انا قاعده فيها لانها دور ارضى ورطوبه ودايما ولادى تعبانين عشان مابيدخلهاش الشمس

وفيوم رحت عشان اخد منه المصروف لقيته بيقولى روحى انا هجيلكم
ليه ماتدهولى دلوقت
اصل العيال وحشونى وهاجى اشوفهم مشيت ولقيته فعلا جه بليل وجايب معاه فاكهه اخدت الفلوس وقعد مع العيال وبعدين قام قلت ماشى لقيته دخل الاوضه ونام على السرير بقوله انت بتعمل ايه
قالى روحى نيمى العيال وتعالى
أنا بنام هنا انا والبنت والولدين بينامو على السرير اللى جوه
نيميها معاهم وتعالى
طلعت البنت باره ودخلتله انت عايز ايه
هعوز ايه هو انتى مش مراتى
مراتك وانت ما افتكرتش انى مراتك غير دلوقتى ماانت سايبنى من سنين
وادينى جيت يالا تعالى
قولتله لأ انا هروح انام مع العيال
وانتى لو ماجتيش تنامى جمبى مش هصرف عليكم تانى
مايهمنيش ومش هسكت المرادى وهرفع عليك قضيه نفقه
اتنرفز وقالى وحياه امك لا هوريكى اللى عمرك ماشوفتيه
هتورينى ايه اكتر من كده غدر وذل ايه تانى
هرميكى فالشارع ولو رفعتى قضيه هاخد منك العيال
ومشى متعصب جريت قفلت الباب وراه ليرجع ويضربنى
لقيته بيخبط على صاحب البيت ولقيته اللى ماكنتش اتوقعه ابدا
الحلقة الثالثة
وخبط على صاحب البيت لقيته بيقوله انت مش كنت عايز الشقه قاله اه ولسه عايزها قاله حضر فلوسك وانا هتنازلك عنها لما تبقى جاهز كلمنى ومشى
بعد ما مشى جريت على صاحب البيت قولتله انتى فعلا هتعمل اللى بيقولك عليه ده
لقيته بيقولى يا بنتى انا عارف انك مظلومه معاه بس انا كمان ڠصب عنى انا ابنى متبهدل فالايجار الجديد ومبيقدرش يدفعه لما تجينى فرصه زى دى عشان اريحه اضيعها مقدرش وانا هستنى عليكى لحد ما تلاقى مكان مش هرميكى فالشارع زى ما قالى بس دورى بسرعه عشان الحق اوضب الشقه انتى شايفه الشقه خرابه كل حاجه فيها عايزه تعديل سامحينى يا بنتى ڠصب عنى
سمعت الكلام ومشيت بس حمدت ربنا انى اشتريت بيت ابويا كان زمانى فعلا اترميت فالشارع انا وولادى وبعد اسبوع مشيت ورحت اقعدت فبيتنا من غير ما اوضبه لانى ممعايش واللى كان عندى من عفش سريرين ودولاب وبوتجاز وغساله عاديه والتلاجه كانت بايزه وبعناها لبتاع الروبابيكيا لانها مش نافعه
المهم اشتغلت على فلوس ايجار المحلات كنت بعيش بيهم انا والعيال وادفع الجمعيه اللى خلصت بيها اختى بس كانو ولادى محرومين من حاجات كتير اوى بس كنت بصبرهم واقولهم اهم حاجه تعلميكم عشان تبقى حياتكم احسن وعدى الوقت وولادى ياسين وياسر دخلو الثانويه وهما فى سنه تالته ويسرا كانت فى سنه اولى ثانوى مصاريفهم تقلت اوى واللى جاى على اد اللى رايح فيوم كنت نازله رايحه الشغل اتكعبلت على السلم ووقعت الحمد لله ما اتكسرتش بس ضهرى اتاذى والدكتور قالى لازم تنامى على ضهرك ومتعمليش حاجه وتعملى علاج طبيعى مايقلش عن شهر
طيب احنا هناكل ونشرب منين وفلوس الدروس العيال فالثانويه ودى سنه مهمه وانا بكلم نفسى بليل وبعيط ابنى ياسين سمعنى من غير ما يقولى راح لابوه المحل يحكيله على اللى حصل
بابا ادينا فلوس على الاقل على ما ماما ماتقدر ترجع تشتغل تانى شتمنى وزعقلى قدام الناس وطردنى
الولد من اللى عمله فيه خرج من المحل مسك طوب وقعد